Diajar Basa Sunda

Lagu Dina Tungtung Waktu

Ku : Dédy Windyagiri

pileuleuyan tungtung imut (8-u)

mustari nitih ka wanci (8-i)

pukak kapegat ku mangsa (8-a)

kasapih ku titis tulis (8-i)

paturay ngulangkeun gupay (8-a)

patebih raga jasmani (8-i)

tilas palawung kagandrung

nyacapkeun nu kapiati

jaga mah kantun waasna

ditilar asa kaletir

longkéwah badan nyorangan

dikantun bati prihatin

lisan haréwos pangjurung

mindingan jeritan ati

nyawang nu bakal kasorang

ahir-ahir nasib diri

ngoléang lir langlayangan

kapakan katebak angin

biheung taun biheung windu

urang sasarengan deui

boa kahalangan kadar

takdir mastikeun lastari

ajal mulangkeun ka asal

mulih ka jati ngajadi

pileuleuyan tungtun lagu

hariring tawis kaéling

haleuang tilam kamelang

mungkas panghareupan wening

sanaos duka iraha

mugi pareng tepang deui

Rumpaka di luhur téh kaasup kana puisi sunda. Puisi anu kauger ku aturan poko guru lagu sareng guru wilangan. Geura sok ku hidep titenan sakur padalisan na ngabogaan guru lagu jeung guru wilangan anu matok.

Conto:

pi-leu-leu-yan tung-tung i-mut (8-u)

Dangding di luhur kaasupna kana dangding/pupuh kinanti. Anu kauger ku guru lagu jeung guru wilangan 8-u,8-i,8-a,8-i,8-a,8-1. Beda deui lamun aturan Asamarandana, Dangdanggula, atawa nu lain.