Diajar Basa Sunda

Aya dua welas kota nu jadi pribumi Piala Dunia 2006 di Jérman téh. Hiji-hijina nya éta hamburg, Hanover, Gélsénkirchen, Dortmund, Bérlin, Léipzig, Koéln, Frankurt, Kaiserlautern, Stuttgart, Nuerenbérg, jeung Munchen. Ari munchén téh puseur nagara Jérman.

Sajero sabulan leuwih, kudu siap pipindahan, ti hiji kota ka kota séjénna. Ti hiji stadion ka stadion séjenna. Utung saméméh jung loba tatanya ka ditu ka dieu. Pangpangna kanu lila kungsi di Jerman. Lian ti éta, rajin macaan brosur nu dikaluarkeun ku panitia.

Puguh deui ari mukaan internét mah. Sirikna téh unggal usik, saban aya waktu kosong tina pagawéan. Ku sabab can pati lila jadi wartawan, can pati réa nagara nu kaanjangan. Ka éropa téh kakara ka Inggris, Spanyol, jeung Itali. Kabéh dina raraga ngaliput maén bal.

Pitilupoéenun deui kana derna kajuaraan, kuring geus aya di Jerman. Ti Jakarta tumpak Garuda. Henteu bisa langsung ka Jerman. Tapi nyimpang heula ka Walanda. Ti dinya ganti kapal. Cunduk ka Kota Munchen, gabung jeung wartawan Indonésia Séjenna.

Nungguan prungna kajuaraan, henteu bisa ulin sangeunahna. Puguh waé upama ngagugu haté mah, hayang ka ditu, hayang ka dieu. Tapi rék ninggalkeun téh komo lila-lila teuing mah melang. Sabab mawa alat-alat gawé. Di antarana laptop, kaméra, jeung rupa-rupa lénsa. Sieun sabot kuring indit-initan, aya jelema jahat asup kana jero fan camp. Ari kudu dibabawa jaba rébo téh, beurat deuih.

Fan camp téh sarua jeung kémah. Ngan eusina leuwih lengkep. Aya dapur, kamar mandi, lian ti tempat saré téh. Di unggal kota tempat kajuaraan lumangsung, sok aya fan camp. Saré di fan camp jauh leuwih murah batan di hotél. Upama séwa hotél pangmurahna, antara sajuta nepi ka dua juta satengah sapoé, di fan camp mah, cukup saparapatna. Matak kacida larisna.

Bobotoh ti mana-mama, lolobana marilih saré di fan camp. Sabab kajeun daratang ti nagara-nagara maju, henteu kabéh jalma baleunghar. Sabalikna orang Indonesia, kajeun nagara miskin, loba nu ngontrak hotél béntang lima. Mangkaning taripna téh aya nu lima juta sapeuting .

Sakali mangsa kuring kudu ngaliput pertandingan Inggris jeung Swedia. Tempatna di Fifa World Cup Stadium Cologne, Kota Koeln. Urang Jerman mah nyarebutna: Stadion Mungersdorfer atawa Rhéin Énérgi Stadion. Gedéna cukup keur 46.120 urang nu lalajo. Kira-kira sarua jeung Stadion Jalak Harupat, Kabupatén Bandung.

Siga kumaha alusna éta stadion, hésé dicaritakeunana. Jukutna bangun empuk, héjo rata kawas buludru. Luhurna bisa ditutup jeung dibuka. Keur ngalusan éta studio, pamaréntah satempat méakkeun waragad Rp.165 milyar leuwih. Ngalusan wungkul éta téh lain nyieun.

Sapaerti biasa sadatangna ka Kota Koéln, nu pangheulana ditéangan téh tempat pamondokan murah. Cilakana, sakali ieu mah, geus teu bisa ngamanfaatkeun fan camp. Sabab geus beak ku pata bobotoh Inggris jeung Swédia.

Iwal bobotoh pribumi, bobotoh Inggris téh jumlahna pangréana. Persis kawas bobotoh Pérsib lamun kasawelasan kadeudeuhna maén di Senayan. Keur ngabédakeunana gampang pisan. Lian ti kaos nu dipakéna, kalakuanana ogé béda.

Biasana téh ngagombongan jeung salangar. Di urang mah, kira-kira sarua jeung bonék, bobotoh Persebaya. Bonék téh “bondo nékat”, indit ti imahna, ukur modal nékad. Tangtu baé bobotoh Inggris mah marekel duit cukup.

“Haben Sie éin Zimmer frei?” cék kuring méh-méhan putus asa, ka patugas hostel (losmen). Aya kénéh kamar kosong?

Naha atuh lain buru-buru ngajawab, kalah malik nanya, “Anjeun urang Jepang? Kuring milu sedih waktu tim anjeun éleh ku Ustrali,” Cenah.

“Kuring mah lain urang jepang tapi orang Indonesia!.”

“Urang Indonésia? Rék naon jauh-jauh ka dieu? Apan tim anjeun mah teu milu kajuaraan?”

“Kuring wartawan. Naha teu meunang wartawan Indonésia Ngaliput piala dunya? Témbal kuring keuheul.

Duka lantaran nénjo beungeut kuring siga nu nyaan ambekna, manéhna buru-buru ménta dihampura. Teu poho ngabéjakeun, teu jauh ti losménna, aya apartemen nu rék diséwakeun . Perenahna di Hélénenwall Strasse.

Nu bogana hiji pangsiunan, ngaranna Guéther Poéperl. Umurna ampir 70 taun. Taripna 39 Euro sapeuting. Kira-kira Rp 500.000. Keur ukuran di Jerman mah, katitih murah pisan. Kabeneranana téh deuih, Si Opa Poeperl téh kacida bageurna . Atuh urut cape kukurilingan néangan pamondokan téh, ahirna asa kaubaran.

Kamus Alit

Dua Welas = dua belas

Puseur = pusat

Saméméh = saacan

Lian = selain

Pagawéan = pekerjaan

Kaanjangan = didatangi

Kabéh = semua

Raraga = dalam rangka

Puguh = pasti/jelas

Pitilupoéeun = tiga hari sebelum

Lalajo = nongton

Tumpak = naik

Sangeunahna = seénaknya

Melang = khawatir

Saparatapatna = setengahnya

Mangkaning = bahkan

Mangsa = waktu

Alus = bagus

Hejo = hijau

Unggal = setiap

Hésé = sulit

Waraga = biaya

Ngalusan = merenovasi

Katitih =terhitung

Bageur = baik

Lumangsug = berlangsung

Saban = Setiap

Beunghar = kaya

Pangheulana = paling dahulu

Mekel = membawa bekal

Rarangkén Tengah Ar

Tangtu baé bobotoh nggris mah marekel duit cukup

Kecap marekel asal kecapna tina mekel (bekel) + rarangkén tengah -ar-

Bekel = bekal

Bekel + N- = Mekel (Membawa bekal)

Mekel + -ar- = Marekel = (Membawa bekal)

Bedana lamun mekel itu pikeun subjek tunggal. Sedengkeun marekel untuk subjek jamak. Perhatikeun conto di handap.

Conto:

Abdi mekel sangu ka sakola.

Saya membawa nasi ke sekolah.

Barudak mekel sangu ka sakola.

Saya membawa nasi ke sekolah.